Бокій атрымаў прэмію НАК «За адданасць алімпійскаму руху»

21-разовы чэмпіён Паралімпійскіх гульняў плывец Ігар Бокій быў удастоены Прэміі Нацыянальнага алімпійскага камітэта.

На цырымоніі ўручэння ўзнагарод па выніках года спартсмен быў адзначаны ў намінацыі «За адданасць алімпійскаму руху». У гэтым верасні Бокій заваяваў пяць залатых медалёў на летніх Паралімпійскіх гульнях у Парыжы і давёў агульную колькасць асабістых узнагарод на Паралімпіядах да 23 (21-1-1). Упершыню Ігар выступіў на галоўным старце чатырохгоддзя яшчэ ў 2012 годзе ў Лондане. На гэты момант беларусу належаць шэсць паралімпійскіх рэкордаў у 50-метровым басейне, апошні з якіх (на дыстанцыі 200 м комплексам) быў устаноўлены на парыжскіх Гульнях.

«Хацеў бы падзякаваць кіраўніцтву краіны і НАКу за такую ўвагу да спорту і за ўсе створаныя магчымасці, якія маюць нашыя спартоўцы, каб паляпшаць свае вынікі і годна прадстаўляць Беларусь на міжнароднай арэне», - сказаў Бокій.

Прэмія НАК па выніках года прысуджаецца за выдатныя спартыўныя вынікі і падрыхтоўку спартсменаў нацыянальных каманд да Алімпійскіх гульняў, чэмпіянатаў свету і Еўропы, а таксама за выключныя заслугі ў развіцці алімпійскага руху, масавага спорту і спорту вышэйшых дасягненняў у Рэспубліцы Беларусь.

БЕЛТА