Бокій выйшаў у фінал Паралімпіяды на стомятроўцы на спіне

Беларускі плывец Ігар Бокій выйшаў у чарговы фінал на XVII летніх Паралімпійскіх гульнях у Парыжы.

У другі дзень спаборніцтваў у басейне Бокій разам з таварышам па камандзе Яўгенам Кавалёнкам выйшлі на старт стомятроўкі на спіне. Абодва спартсмены прынялі ўдзел у другім папярэднім заплыве. Ігар пераадолеў дыстанцыю з лепшым вынікам (58,97 сек.), а па выніках абодвух заплываў час беларуса аказаўся другім - яшчэ хутчэй справіўся расіянін Уладзімір Сотнікаў (58,32). Кавалёнак з паказчыкам у 1 мін 05,97 сек. стаў апошнім сярод 14 удзельнікаў, у фінал прайшла наймацнейшая васьмёрка.

Вырашальны заплыў на дыстанцыі 100 м на спіне, на якой Ігар Бокі з'яўляецца паралімпійскім рэкардсменам, адбудзецца сёння вечарам. Арыентыровачны час пачатку - 21.45 па мінскім часе. Напярэдадні беларус стаў чэмпіёнам парыжскіх Гульняў на дыстанцыі 100 м батэрфляем, усяго ў нашага плыўца 19 медалёў у кар'еры на Паралімпіядах (17-1-1).

БЕЛТА