Чацвёрты этап чэмпіянату і першынства краіны па мотакросе пройдзе 2 і 3 верасня ў Магілёве. Пра гэта распавёў старшыня Магілёўскай абласной арганізацыйнай структуры ДТСААФ Аляксандр Мазур.
Спаборніцтвы збяруць больш за 100 спартсменаў з усіх рэгіёнаў краіны, таксама плануецца прыезд прадстаўнікоў Расіі з Пскоўскай, Бранскай і Смаленскай абласцей. Дарэчы, сярод гоншчыкаў будуць знакамітыя спартсмены - чэмпіёны Беларусі і Еўропы. Праграма разлічана на ўдзельнікаў розных узростаў - ад 5 да 60 гадоў. Прадугледжаны заезды ў некалькіх класах, у тым ліку - пачатковец, нацыянал, ветэраны ў дзвюх катэгорыях (да і старэйшыя за 50), хобі. Так, у першы дзень пройдуць спаборніцтвы 50 куб.см, 85 куб.см, 125 куб.см (мужчыны), нацыянал, у другі - 65 куб.см, ЕМХ 125 куб.см, арэn і матацыклы з каляскай. Прадугледжаны адначасовы старт разу 24 матацыклаў.
У гарадскім экстрым-парку гоншчыкі пераадолеюць трасу працягласць 2,1 км, на якой прадугледжаны 12 трамплінаў з перападам вышынь да 60 м. «Магілёўская траса адрозніваецца ўнікальным рэльефам нават у маштабах СНД, сёлета ёй спаўняецца 20 гадоў, - адзначыў Аляксандр Мазур. - Яна дазваляе спартсменам паказаць сваё майстэрства - максімум прафесіяналізму і відовішчнасці, а гледачам ацаніць іх тэхніку і прыгажосць гэтага віду спорту. Бо мотакрос - гэта заўсёды эфектна. Заўсёды захоплівае дух, калі глядзіш на лятучых гоншчыкаў - яны разганяюцца, падскокваюць на трампліне і як быццам завісаюць у паветры».
Аляксандр Мазур адзначыў, што мотакрос - гэта адзін з самых эмацыйных і тэхнічных відаў спорту, які патрабуе сур'ёзнай падрыхтоўкі і, вядома ж, моцнага фізічнага здароўя, бо не кожны па медыцынскіх паказаннях зможа ім займацца. Цікавы факт, але ў мотакросе назіраецца вялікая пераемнасць пакаленняў - калі бацькі захапляюцца гэтым відам спорту, то высокая верагоднасць таго, што і дзіця рушыць услед іх прыкладу. Секцыі па падрыхтоўцы такіх спартоўцаў у рэгіёне ёсць у Магілёве, Бабруйску і Асіповічах.
БЕЛТА
