Быхаўчанка Наталля Варакіна стала чэмпіёнкай Еўропы па барацьбе сярод моладзі

Беларуская спартсменка Наталля Варакіна перамагла на маладзёжным чэмпіянаце Еўропы па барацьбе 2024 года, які праходзіць у Баку.

Спартсменка з Быхава заваявала залаты медаль у вагавой катэгорыі да 50 кг. Напярэдадні беларуска перамагла славачку Крысціну Басіч, Шахану Назараву з Азербайджана і румынку Ану Марыю Пірву, а сёння ў фінальным паядынку нанесла паражэнне Зехрэ Дэмірхан з Турцыі. Раней у сваёй кар'еры Наталля Варакіна станавілася бронзавым прызёрам Летніх Юнацкіх Алімпійскіх гульняў, а таксама сярэбранай медалісткай II Гульняў краін СНД.

Гэта ўзнагарода вышэйшай пробы стала для беларускай каманды першай на кантынентальным форуме і другой у суме - напярэдадні серабро ў катэгорыі да 97 кг у прадстаўнікоў грэка-рымскага стылю выйграў Абубакар Хаслаханаў. Таксама ў чацвер за медаль маладзёжнага ЧЕ змагалася наша Аляксандра Булава, але ў паядынку за бронзу ў вазе да 55 кг беларуска ўступіла Анастасіі Яндушкінай з Расіі.