Дынара Смольская стала другой у гонцы праследавання на Кубку наймацнейшых спартсменаў

Беларуска Дынара Смольская стала прызёрам гонкі праследавання на Кубку наймацнейшых спартсменаў па біятлоне, які праходзіць у «Раўбічах».

На старт 10-кіламетровай дыстанцыі Смольская выходзіла другой у шасці секундах ззаду чэмпіёнкі спрынту Наталлі Шаўчэнка. Беларуска хутка дагнала расіянку, стартавае кола саперніцы скончылі разам. Стартавы агнявы рубеж абедзве дзяўчыны прайшлі без памылак, на другой ляжцы сінхронна прамахнуліся апошнім стрэлам, але першую стойку Дынара адпрацавала на нуль, у той час як Наталля зазірнула на штрафны круг.

Да заключнай стральбы наша біятланістка падыходзіла з запасам у паўхвіліны, і нават дадатковыя 150 метраў не перашкодзілі ёй пайсці на заключную пятлю лідэрам з перавагай над праследавацельніцамі ў 12 секунд. Аднак, як і напярэдадні, на апошняе кола сіл у Смольскай не хапіла: Шаўчэнка адыграла адставанне і фінішавала першай. Дынара - зноў са срэбрам. Тройку прызёраў замкнула Анастасія Халілі.

Што да вынікаў іншых беларусак, то Дар'я Кудаева заняла 17-е месца, Ксенія Варабей размясцілася на 21-пазіцыі, Адэліна Сабітава стала 25-й, Ірына Шаклеіна - 27-я, Ганна Сола сышла з дыстанцыі.

БЕЛТА