Дзінара Алімбекава выйграла спрынт на этапе КМ па біятлоне ў Хохфільцэне

Беларуская біятланістка Дзінара Алімбекава выйграла спрынтарскую гонку на трэцім этапе Кубка свету ў Хохфільцэне (Аўстрыя), які стартаваў сёння.

Дыстанцыю ў 7,5 км з двума агнявымі рубяжамі і без промахаў беларуска пераадолела за 20 мін 12,3 сек.

Другой фінішавала нарвежка Цірыл Экхоф, якая адстала ад беларускі на 8,5 сек. з адным промахам на агнявым рубяжы. Замкнула тройку прызёраў немка Францыска Пройс, якая адстала ад пераможцы на 9,9 сек. і дапусціла адну недакладнасць на стрэльбішчы.

Што тычыцца астатніх спартсменак з Беларусі, то Ірына Крыўко стала 17-й (адставанне 49,8 сек, 1 промах), Ганна Сола – 42-я (+1 мін, 3), Алена Кручынкіна – 57-я (+2 мін, 3).

Сёння ў праграме спаборніцтваў таксама мужчынскі спрынт на 10 км. У гонцы прымуць удзел беларускія стральцы-лыжнікі Максім Варабей, Антон Смольскі, Сяргей Бачарнікаў, Раман Ялётнаў і Мікіта Лабастаў.

БЕЛТА