Дзінара Алімбекава займае пятае месца ў агульным заліку Кубка свету па біятлоне

Беларуская біятланістка Дзінара Алімбекава займае пятае месца ў агульным заліку Кубка свету пасля чатырох праведзеных этапаў.

Перад стартам чацвёртага кубкавага этапу ў аўстрыйскім Хохфільцэне яна была другой, але пасля яго завяршэння не здолела ўтрымацца ў тройцы лідараў. У Аўстрыі Дзінара Алімбекава выступіла няўдала: у спрынтарскай гонцы на 7,5 км заняла толькі 31-е месца, у гонцы пераследу фінішавала на 11-й пазіцыі, а ў мас-старце аказалася на 20-м радку выніковага пратакола.

Зараз у актыве лідара беларускай жаночай каманды 326 ачкоў. Генеральную класіфікацыю ўзначальвае нарвежская біятланістка Марта Олсбю-Ройселан, у якой 415 заліковых балаў, на другой пазіцыі шведка Ганна Эберг – 378 ачкоў, трэцяй ідзе яшчэ адна нарвежская спартсменка Тырыль Экхаф – 346 балаў, замыкае квартэт фаварытаў шведская біятланістка Эльвіра Эберг – 334 ачкі.

На чатырох стартавых кубкавых этапах заліковыя ачкі зарабілі яшчэ тры прадстаўніцы Беларусі: Алена Кручынкіна – 100 (27-е месца ў агульным заліку), Ірына Крыўко – 97 (29) і Ганна Сола – 65 (37). У заліку Кубка нацый жаночая зборная Беларусі займае 7-е месца, набраўшы 2252 ачкі. Лідзіруе каманда Швецыі – 2871 бал, другой ідзе зборная Нарвегіі – 2745, на трэцім месцы біятланісткі Францыі – 2682.

У асабістым заліку ў мужчын лідарства захоўвае нарвежскі біятланіст Ёханэс Бё, у якога 428 ачкоў, на другім месцы яго суайчыннік Стурла Холм Легрэйд – 373, трэцюю пазіцыю займае швед Себасцьян Самуэльсан – 344. Найлепшы з беларускіх біятланістаў Антон Смольскі мае 92 ачкі і займае 29-е месца. У Сяргея Бачарнікава 86 балаў (32-е месца), Максім Варабей набраў 39 балаў (43), у Рамана Ялетнава 15 ачкоў (56). У заліку Кубка нацый беларуская зборная знаходзіцца на 8-й пазіцыі, маючы ў сваім актыве 2052 ачкі. Наперадзе біятланісты Нарвегіі – 3033, на другой пазіцыі каманда Швецыі – 2714, трэцяе месца ў зборнай Германіі – 2629.

Пяты этап Кубка планеты ў пачатку 2021 года прыме нямецкі Аберхоф. Яго ўдзельнікам трэба будзе правесці шэсць гонак:

8 студзеня – мужчынскі спрынт на 10 км і жаночы спрынт на 7,5 км;

9 студзеня – мужчынская гонка пераследу на 12,5 км і жаночая гонка пераследу на 10 км;

10 студзеня – змешаная эстафета і адзіночная змешаная эстафета.

БЕЛТА