Фінал Усебеларускага кросу стартаваў у Магілёве

Сёння ў Магілёве – фінал Усебеларускага кросу на прызы выдавецкага дома «Беларусь сегодня». Турнір, які падводзіць вынікі цяперашняга няпростага сезона.

Прысвячэнне

Афіцыйна сваю гісторыю Усебеларускі крос на прызы выдавецкага дома «Беларусь сегодня» вядзе з 1998 года. Ужо нямала: больш за 22 гады! Але ў рэчаіснасці карані ў гэтых забегаў яшчэ глыбейшыя. Кросавыя спаборніцтвы на прызы газеты «Праўда» ў часы СССР ахоплівалі ўсю краіну і прыводзілі на трасы вялізную колькасць аматараў і спартсменаў усіх узростаў. Беларусь не была выключэннем, і, магчыма, таму ініцыятыва адраджэння «праўдзінскіх» забегаў, але ўжо ў новай вокладцы, пад патранатам самай масавай газеты краіны, была ахвотна падхопленая. Крос з тых часоў не аднойчы мяняў месца правядзення. Фінал праводзіўся ў Лідзе, Маладзечне, Наваполацку, Мінску, Магілёве. Забегі набіралі папулярнасць і вагу. Ужо амаль дзясятак гадоў фінал Усебеларускага кросу на прызы Выдавецкага дома «Беларусь сегодня» прысвячаецца Дню Перамогі ў Вялікай Айчыннай вайне. Сёлета ў Беларусі адзначаюць 75-ю гадавіну гэтай падзеі, і таму, нягледзячы на тое што са звыклага месца ў календары (напярэдадні 9 Мая) спаборніцтвы пераехалі на восень, не правесці іх проста не маглі. Дарэчы, трэці раз запар спаборніцтвы, аб’яднаныя з кубкам Беларусі па кросе і турнірам па эстафетным бегу на прызы заслужанага трэнера краіны Аляксандра Кіцэнкі, пройдуць у Магілёве. Адзін з арганізатараў – старшы трэнер Магілёўскай вобласці Дзмітрый Сівоў – кантраляваў увесь працэс падрыхтоўкі і запэўнівае: да стартаў у паркавай зоне ля праспекта Міру ўсё гатова.

– У гэтым годзе мы некалькі скарэктавалі трасу, яна стала яшчэ больш цікавай і складанай. Тут нядаўна праходзіў абласны этап кросу: удзельнікі праверылі ўсе на ўласным вопыце і засталіся задаволеныя.

Перамогі

Крос – аснова лёгкай атлетыкі. З яго пачынаюцца вялікія перамогі. Больш за тое, бег па перасечанай мясцовасці стаў адпраўным пунктам шляху ў спорце для многіх з тых, хто пасля праявіў сябе ў скачках або кіданні. Ды і зараз па тым, як спартсмен адчувае сябе на кросавай дыстанцыі, можна многае сказаць пра яго перспектывы. Не дзіўна, што ў ранейшыя гады на дыстанцыю Усебеларускага кросу разам з аматарамі і маладымі спартсменамі выходзіла нямала прызнаных лідараў. Многія з іх пасля змаглі заявіць пра сябе на чэмпіянатах Еўропы, свету і нават алімпіядах. Не стане выключэннем і цяперашні забег. Сярод удзельнікаў – амаль усе наймацнейшыя беларускія спартсмены на дыстанцыях ад 800 метраў да марафону. Галоўныя фаварыты – Сяргей Платонаў і Ніна Савіна – сур’ёзна рыхтуюцца і да будучага лета. У Ніны, напрыклад, ужо ёсць ліцэнзія на алімпіяду, і, калі б не каранавірусная пандэмія, ужо ў мінулым жніўні дзяўчына штурмавала б марафонскую трасу ў Токіа. У Сяргея амбіцыі пакуль крыху больш сціплыя, але чэмпіянат Еўропы ў яго выпадку выглядае цалкам рэальнай перспектывай. Наколькі здзяйсняльнай – павінен паказаць у тым ліку і фінал Усебеларускага кросу.

СБ