Хакеісты «Дынама-Шынніка» абгулялі «Алмаз» у МХЛ

Хакеісты бабруйскага «Дынама-Шынніка» ўдала завяршылі першую ў каляндарным годзе хатнюю серыю матчаў у рэгулярным чэмпіянаце Маладзёжнай хакейнай лігі сезона-2024/25.

Учора падапечныя Андрэя Міхалёва абгулялі «Алмаз» з Чарапаўца з лікам 1:0. Аўтарам адзінай шайбы на сёмай секундзе трэцяга перыяду стаў Дзмітрый Хобян. Такім чынам, у дамашняй серыі супраць каманд з «Залатога» дывізіёна бабруйчане набралі два балы з шасці магчымых, раней нашы хлопцы ўступілі маскоўскаму «Дынама» (3:4) і яраслаўскаму «Лока» (2:5).

«Дынама-Шыннік» працягвае ўзначальваць табліцу «Срэбнага» дывізіёна Заходняй канферэнцыі МХЛ, у нашай каманды 68 ачкоў у 43 гульнях. Далей бабруйчан чакаюць яшчэ чатыры гульні на родным лёдзе - 12 і 13 лютага юныя дынамаўцы прымуць «Сахалінскіх Акул», а 16 і 17 лютага сустрэнуцца з «Тайфунам» з Уладзівастока.

БЕЛТА