Хакеісты «Дынама-Шынніка» паўторна абыгралі «Тайфун» у Маладзёжнай хакейнай лізе

Хакеісты бабруйскага «Дынама-Шынніка» атрымалі другую перамогу на старце Маладзёжнай хакейнай лігі.

У аўторак на «Бабруйск-Арэне» падапечныя Андрэя Міхалёва правялі другую за два дні сустрэчу супраць «Тайфуна» з Прыморскага края. Гаспадары лёду адкрылі лік ужо на 6-й мінуце - пры гульні ў большасці вызначыўся Мацвей Шыдлоўскі. Гэта шайба доўгі час заставалася для беларусаў адзінай, сапернікі ж здолелі зраўнаваць лічбы ў другім перыядзе і нават выйсці наперад у сярэдзіне заключнай трэці. За пяць мінут да сірэны юныя дынамаўцы ўсё яшчэ ўступалі з лікам 1:2, але часу, які застаўся, хапіла, каб пераламаць ход гульні на сваю карысць. Дакладнымі кідкамі адзначыліся Дзмітрый Тукач і Багдан Белкін - у выніку 3:2 на карысць нашай каманды.

Першая сустрэча «Дынама-Шынніка» і «Тайфуна», якая прайшла 4 верасня, стала для абодвух калектываў дэбютнай у новым сезоне і завяршылася перамогай беларускага клуба з лікам 6:5. Наступныя матчы ў МХЛ бабруйчане правядуць 8 і 9 верасня таксама на дамашняй пляцоўцы супраць «Сахалінскіх Акул».

БЕЛТА