Хакеісты «Дынама-Шынніка» выйгралі трэці матч запар у МХЛ

Хакеісты «Дынама-Шынніка» атрымалі перамогу ў госцевым матчы рэгулярнага чэмпіянату Маладзёжнай хакейнай лігі.

Пасля матчаў у Хабараўску і Уладзівастоку падапечныя Андрэя Міхалёва адправіліся ў Паўднёва-Сахалінск, дзе нашу каманду прымалі мясцовыя «Сахалінскія акулы». Мінулым разам супернікі гулялі паміж сабой яшчэ ў пачатку верасня ў Бабруйску, тады «шыннікі» атрымалі перамогі ў абедзвюх сустрэчах (4:2, 4:1). Трэці вочны паядынак аказаўся для абодвух клубаў найменш дзейсным у сезоне, у гаспадароў у атацы не атрымалася зусім нічога, а гасцям для перамогі хапіла дзвюх закінутых шайб. У сярэдзіне другога перыяду наперад беларусаў вывеў Міраслаў Міхалёў, а за тры хвіліны да фінальнай сірэны Мікіта Хадаровіч у большасці ўстанавіў канчатковы вынік - 2:0. Галкіпер бабруйчан Ціхан Чайка ўпершыню ў гэтым сезоне захаваў вароты на замку.

Гэты поспех стаў для «Дынама-Шынніка» пятым у сямі апошніх сустрэчах. Дзякуючы ўдаламу адрэзку наша каманда зраўнялася па ачках з падмаскоўным «Атлантам» на другім месцы Сярэбранага дывізіёна Заходняй канферэнцыі МХЛ. У абодвух клубаў па 40 балаў, але «Атлант» згуляў на пяць матчаў менш. Заўтра дынамаўцаў чакае паўторны паядынак супраць «Сахалінскіх акул», які стартуе ў 11.00 па беларускім часе. Гэтая гульня стане для бабруйчан апошняй выязной у адыходзячым годзе.

БЕЛТА