Хакеісты «Дынама-Шынніка» закінулі чатырнаццаць шайб у матчы МХЛ

Хакеісты «Дынама-Шынніка» атрымалі найбуйнейшую перамогу ў бягучым сезоне Маладзёжнай хакейнай лігі.

Падапечныя Андрэя Міхалёва другі раз за два дні дома сустракаліся з «Сахалінскімі Акуламі». Напярэдадні бабруйчане былі мацнейшымі з лікам 6:3, сёння перавага нашай каманды аказалася значна большай. Першы перыяд скончыўся для гаспадароў з адносна сціплым лідэрствам у тры шайбы, у другой трэці дынамаўцы паразілі чужыя вароты адразу сем разоў, а ў заключнай - яшчэ чатыры разы. Госці здолелі адказаць толькі адным дакладным кідком, у выніку беспрэцэдэнтныя 14:1 - найбуйнейшая перамога «Дынама-Шынніка» ў МХЛ.

Дублі за нашу каманду аформілі Алег Хомчанка і Ілля Лахноў, па шайбе закінулі Арсеній Елісееў, Мікіта Хадаровіч, Арсеній Чухраеў, Мацвей Шыдлоўскі, Багдан Белкін, Кірыл Лазоўскі, Арцём Капусцін, Аляксандр Яцэнка, Глеб Корзун і Аляксандр Ярмоленка. Бабруйскі клуб працягвае ўзначальваць табліцу «Срэбнага» дывізіёна Заходняй канферэнцыі МХЛ, набраўшы 72 ачкі ў 45 матчах. Хатняя серыя нашай каманды працягнецца 16 і 17 лютага паядынкамі супраць далёкаўсходняга «Тайфуна».

БЕЛТА