Хоцімскаму льнозаводу – 90 гадоў

29 верасня слаўнаму Хоцімскаму льнозаводу, які вырошчвае самую каштоўную ва ўсім свеце культуру – лён, спаўняецца 90 гадоў. Салідная дата ў гісторыі аднаго з найлепшых ільнозаводаў Беларусі – выдатная нагода перагартаць летапіс аб ветэранах і найлепшых працаўніках прадпрыемства.

– Юбілейная дата прыйшлася на канец верасня, але ў гэты час для святкавання не самы зручны момант, – падказваюць мне на тэрыторыі завадчане. – Надвор’е ў гэтым годзе нарабіла чорных спраў, але нарэшце выглянула сонейка, таму ўсе думкі зараз пра тое, каб прыбраць ільнотрасту з палёў. Вядзецца ўспушванне, лён падсохне, і калі зноў не пойдзе дождж (а ў сіноптыкаў канкрэтыкі на гэты конт няма), то пачнём прэсаванне. Зрэшты, дзед ведае, што рабіць.

Дзед... У вымаўленні гэтага слова пачулася глыбокая павага і непадробная пашана, любоў і цеплыня да чалавека.

Калі я расказаў пра гэта дырэктару ААТ «Хоцімскі льнозавод» Мікалаю Курзянкову, на адрас якога яно было вымаўлена, ён толькі ўсміхнуўся.

– А не паспрачаешся, ідзе 36-ы год, як узначальваю ільнозавод, – разважае Мікалай Ягоравіч. – Не так ужо шмат кіраўнікоў дырэктарскага корпуса рэспублікі з такім паслужным спісам.

З гэтым цяжка не пагадзіцца. Сапраўды, трохі знойдзеш кіраўнікоў аграпрамысловага комплексу ў вобласці, ды і на прасторах рэспублікі, якія аднолькава паспяхова працавалі і ва ўмовах сацыялістычнага гаспадарання, і знайшлі сябе ў новых эканамічных рэаліях. Курзянкоў Мікалай – адзін з іх.

Ён стаў неад’емнай часткай гісторыі Хоцімшчыны і Магілёўшчыны. Ільнозавод у ліку лідараў ільнаводчых прадпрыемстваў краіны. На завод можна хоць сёння весці любую дэлегацыю і не чырванець, не саромецца. Тэрыторыя прыбраная, добра абсталяваныя бытавыя памяшканні, талкова арганізаваная праца, адзначаецца высокая якасць прадукцыі.

Дагледжаныя палі, тое, чым так захапляюцца хацімчане і госці раёна, – гэта ільнозавод. Там, дзе пастаянна памятаюць і кіруюцца прымаўкай «капейка рубель беражэ», дзе без грошай не бываюць – гэта таксама ільнозавод. Тут прытрымліваюцца прынцыпу: рабі, як у сябе дома. Строгае выкананне рэгламентаў, сучасныя тэхналогіі, нюх і разумная рызыка дазваляюць мінімізаваць уплыў надвор’я і атрымліваць годныя ўраджаі. Выніковасць спецыялістаў і рабочых дасягаецца на аснове ўзаемадзеяння складанай сістэмы: чалавек – зямля – матэрыяльна-тэхнічныя рэсурсы – тэхналогія – надвор’е. Пакуль на заводзе не могуць кіраваць толькі апошнім фактарам.

Несумненна, поспехі прадпрыемства звязаны з імем Мікалая Курзянкова. Ён з тых людзей, якія асэнсавана і настойліва выбудоўваюць сваё жыццё, свой уклад, свае перавагі. Не пальцам у неба, і не як бог на душу пакладзе, а грунтоўна, па-сялянску ашчадна, граматна.

Здабытак, багацце і гонар прадпрыемства – надзейныя людзі, калектыў дасведчаных прафесійных работнікаў, якія хварэюць за вытворчасць, адказных і безадмоўных. Пра гэта ўвесь час гаварыў і гаворыць Мікалай Курзянкоў падчас нашых сустрэч з ім. Задача перад ільнаводамі кожны год стаіць адна – вырасціць высокі, здаровы лён і атрымаць больш доўгага валакна. Вынік залежыць ад глыбіні прапрацоўкі ўсіх нюансаў, аб’ектыўных і суб’ектыўных фактараў, умоў, у якіх сёння знаходзяцца ільновытворцы.

У кабінеце дырэктара на бачным месцы знаходзіцца мноства грамат, дыпломаў, падпісаных аж да прэм’ер-міністра. Ён узнагароджаны медалём «За працоўныя заслугі», таксама, як і галоўны інжынер Мікалай Люсікаў і кіроўца Віктар Мінчанка. Па выніках працы за 2017 год яго прызналі «Чалавекам года Магілёўшчыны», а імя было занесена на Дошку гонару Магілёўскай вобласці.

 hotimsk.by