Каманда Магілёўскай вобласці заняла другое месца ў медальным заліку фінальнага этапа «Снежнага снайпера»

Каманда сталіцы выйграла медальны залік фіналу рэспубліканскіх спаборніцтваў па біятлоне «Снежны снайпер» на прызы Прэзідэнцкага спартыўнага клуба.

У сезоне «Снежнага снайпера» 2024/25 прынялі ўдзел больш за 14 тыс. рабят, якія не займаюцца біятлонам у спецыялізаваных установах. Да рэспубліканскага фіналу дайшлі 168 найлепшых юных спартсменаў, якія пераадолелі бар'ер рэгіянальных этапаў спаборніцтваў. Удзельнікі фінальнага турніру разыгралі ўзнагароды ў спрынтах, гонках з масавым стартам і змешаных эстафетах у трох узроставых катэгорыях: малодшай (2014-2015 г.н.), сярэдняй (2012-2013 г.н.) і старэйшай (2010-2011 г.н.).

Перамогу ў медальным заліку атрымала зборная Мінска, спартсмены якой заваявалі 18 узнагарод (8 залатых, 6 сярэбраных і 4 бронзавыя). Другое месца па колькасці прызавых месцаў заняла каманда Магілёўскай вобласці (2-5-3), шэсць узнагарод з «Раўбічаў» павязуць хлопцы з Брэсцкай вобласці (1-2-3). Ідэнтычныя вынікі паказалі прадстаўнікі Гомельскай і Віцебскай абласцей (1-1-2), у актыве Гродзенскай вобласці два золаты, у Мінскай вобласці - дзве бронзы.

Рэспубліканскія спаборніцтвы сярод дзяцей і падлеткаў па біятлоне «Снежны снайпер» на прызы Прэзідэнцкага спартыўнага клуба праводзяцца з 2007 года. Прызёры вырашальнага этапа турніру акрамя медалёў былі ўзнагароджаны кубкамі, дыпломамі і сертыфікатамі ад Прэзідэнта Рэспублікі Беларусь, кожны фіналіст атрымаў спартыўную экіпіроўку для далейшых заняткаў.

БЕЛТА