Магіляўчанка Сюзана Валадзько атрымала алімпійскую ліцэнзію ў цяжкай атлетыцы

У тайландскім Пхукет працягваецца Кубак свету па цяжкай атлетыцы, які з'яўляецца заключным кваліфікацыйным стартам на летнія Алімпійскія гульні 2024 года.

З кожнай вагавой катэгорыі ў штангістаў пуцёўкі ў Парыж атрымліваюць атлеты, якія ўвайшлі ў топ-10 сусветнага рэйтынгу па выніках усіх адборачных стартаў. Кожны суіскальнік ліцэнзіі павінен быў прыняць удзел мінімум у пяці кваліфікацыйных турнірах, гэтае патрабаванне выканалі чацвёра беларускіх спартсменаў. Ліцэнзію на Гульні ў цяжкай атлетыцы беларускай камандзе прынесла Сюзана Валадзько, якая выступае ў вазе да 71 кг.

Перад стартам Кубка свету наша спартсменка займала 9-ю пазіцыю ў агульным табелі з сумай 242 кг. На кубку свету беларуска падняла 108 кг у рыўку і справілася з вагой 129 кг у штуршку, вынік Валадзько ў 237 кг прынёс ёй 10-е месца на турніры. Шэсць з дзевяці дзяўчат, якія апярэдзілі Сюзану, ужо знаходзіліся вышэй за яе ў рэйтынгу, яшчэ двое саперніц не здолелі перасягнуць лічбу 242 кг, а бронзавая медалістка Кубка Сон Кук Х'ян з КНДР не зможа выступіць на Гульнях з-за папярэдняй дыскваліфікацыі краіны. Такім чынам, Валадзько захавала 9-е месца рэйтынгу.

БЕЛТА