Рус Бел Eng 中文

Магілёўская вобласць рыхтуецца да рэалізацыі пілотнага праекта па павышэнні энергаэфектыўнасці старых дамоў

Квітанцыі аб аплаце ЖК-паслуг у ацяпляльны сезон звычайна цяжэюць. Аднак на ацяпленні, як на самай затратнай паслузе, можна зэканоміць за кошт павышэння энергаэфектыўнасці жылля. Магілёўская вобласць стала адной з пілотных пляцовак па рэалізацыі такога праекта. Якія першыя крокі ўжо зроблены? Дзе і якія дамы прымяраюць на сябе «кажушкі»?

Да кожнага дома – індывідуальны падыход

Аднымі з першых на цеплавую рэнавацыю пагадзіліся жыхары дома № 64 па вуліцы Чалюскінцаў у Магілёве.

– Знайшоўся актывіст, які абышоў кватэры сваіх суседзяў, заручыўся іх падтрымкай. І прынёс да нас калектыўны зварот з просьбай уключыць іх дом у праект цеплавой мадэрнізацыі, – расказвае намеснік гендырэктара ўпраўлення камунальных прадпрыемстваў Магілёўскага гарвыканкама Іван Вараб’ёў. – Дагавор на выкананне работ будзе заключаны з кожным з жыхароў.

Спецыяліст адзначае: гаворка ідзе не толькі аб банальным уцяпленні сцен. Цеплавая мадэрнізацыя можа ўключаць таксама ўцяпленне даху і гарышчаў, замену цеплавузлоў, рэканструкцыю сістэм ацяплення і гарачага водазабеспячэння, устаноўку прыбораў індывідуальнага ўліку і рэгулявання цяпла, замену вокнаў у месцах агульнага карыстання і гэтак далей. Рашэнне аб тым, якія менавіта меры патрэбны для павышэння энергаэфектыўнасці будынка, будзе прымацца пасля яго дэталёвага абследавання. На кожны дом таксама складаецца свой праект цеплавой мадэрнізацыі. Як гаворыцца, прымяняецца індывідуальны падыход.

Уласна, як і да звычайнага капрамонту. Напрыклад, у адных магілёўскіх хрушчоўках мяняюць балконы на лоджыі, у іншых – проста рамантуюць. Часам, па сведчаннях экспертаў, у капрамонт уключаюць і частку работ па цеплавой мадэрнізацыі: напрыклад, рамонт стыкаў сценавых панэляў, дадатковае ўцяпленне пад аркамі і гэтак далей. Але гэта ў асноўным аднаўленне тэхнічных уласцівасцяў будынка. А новы падыход дазволіць праблему энергаэфектыўнасці дамоў вырашыць кардынальна.
Праўда, запатрабуе ён удзелу не толькі дзяржавы, але і ўласнікаў жылля. Галоўнае – іх згоду. На сходах гараджанам прапануюць выбраць: правесці мадэрнізацыю ў поўным аб’ёме або спыніцца на якім-небудзь з пакетаў па павышэнні энергаэфектыўнасці. У якую суму што абыдзецца – таксама не сакрэт: жыхарам пададуць падрабязную калькуляцыю маючых адбыцца работ і расходных матэрыялаў.

Кампенсаваць сваю долю выдаткаў на ўцяпленне дома магілёўцы змогуць на працягу дзесяці гадоў – так, каб памесячная плата была пасільная кожнаму. У жыроўку гэты артыкул выдаткаў будзе ўключаны па факце праведзеных работ. І, па сутнасці, пагасіць яе дапаможа эканомія выдаткаў на ацяпленне. Пры гэтым для шматдзетных, маламаёмных і іншых сацыяльна менш абароненых грамадзян, акрамя таго, прадугледжаны шэраг прэферэнцый.

Падымаем градус

Усяго ў круг патэнцыйных удзельнікаў праекта ў вобласці ўвайшло каля ста дамоў. У іх ліку – панэльныя шматпавярхоўкі Магілёва, Бабруйска, Быхава, Асіповіч. Лічбы прыводзіць начальнік Магілёўскага аблупраўлення па наглядзе за рацыянальным выкарыстаннем паліўна-энергетычных рэсурсаў Аляксандр Баргацін. У асноўным у гэтым пераліку будынкі ўзору 1970–1980 гадоў, а таксама першай паловы 1990-х, узровень цеплаізаляцыі у якіх нізкі, а спажыванне цеплавой энергіі ў паўтара-два разы большае, чым у будынках сучаснай пабудовы. Падчас мадэрнізацыі ў іх плануецца знізіць удзельнае спажыванне цяпла да 90 кВт/гадз на квадратны метр жылля.

Святлана МАРКАВА, СБ

Пры выкарыстанні матэрыялаў актыўная гіперспасылка на mogilev-region.gov.by абавязковая