Магілёўскі камбінат сілікатных вырабаў рэалізуе буйны інвестпраект

Экспартна арыентаванае ЗАТ «Магілёўскі камбінат сілікатных вырабаў» пастаўляла краінам-суседзям больш за 75 працэнтаў адгружаемай прадукцыі – гэта шырокі спектр матэрыялаў для будаўніцтва, уцяплення і аздаблення будынкаў. Але ва Украіну пастаўкі спыніліся, у чэрвені праз санкцыі будуць вымушаны ад іх адмовіцца прыбалтыйскія партнёры, а на пакінутым для экспартных паставак расійскім рынку расце канкурэнцыя. Аднак планы па выпуску прадукцыі не знізіліся, наадварот, канвеер не спыняецца круглыя суткі!

Першы час, як гаворыць машыніст струменевых і канвеерных ліній Ігар Талстоў, знешнепалітычная абстаноўка трывожыла калектыў, у якім 580 чалавек:

– Глядзелі навіны, перажывалі, што будзе далей. На шчасце, у нас граматныя кіраўнікі, якія хутка зарыентаваліся, таму працягваем актыўна працаваць.

У красавіку машыніст адзначыў 14-ю гадавіну свайго прыходу на КСВ. Кажа, тут усё жыццё працаваў яго тата – фота перадавіка вісела на гарадской Дошцы гонару. Мама таксама працавала на камбінаце, а таксама два дзядзькі, айчым:

– Такіх прыкладаў, калі ўладкоўваюцца на працу ўслед за сваякамі, тут шмат. Пагадзіцеся, калі б камусьці працавалася на КСВ дрэнна, ён бы не параіў гэта месца блізкім. Вось і я прыйшоў сюды з іншай арганізацыі, дзе мяне не задавальняў заробак.

За час працы на камбінаце Ігар Талстоў купіў машыну і кожны год возіць сям’ю на адпачынак. Старэйшай дачцэ дапамог пабудаваць кватэру, фінансава падтрымлівае малодшага сына, які заканчвае універсітэт. Гэты дастатак, лічыць Ігар Германовіч, наўпрост звязаны з паспяховым прадпрыемствам:

– КСВ умее працаваць, удасканальваецца сямімільнымі крокамі. На маіх вачах з’явілася новая вытворчая лінія, пашырылася лінейка выпускаемай прадукцыі. Рэгулярна мяняецца абсталяванне, праводзіцца мадэрнізацыя. Камбінат дбайна адносіцца да якасці тавару, і гэта добра: адчувае адказнасць перад пакупніком. Прыемна быць да гэтага датычным!

Дзевяць месяцаў працуе на камбінаце машыністам перадатачнага моста магілёвец Максім Карасёў. Гэта яго першы запіс у працоўнай:

– Пасля арміі задумаўся аб пошуку працы. Жыву недалёка ад завода, бачыў, як да яго фуры ў чаргу выстройваюцца. Думаю, туды і трэба ісці. Цяпер разумею, адкуль такі попыт на тавар. Будавалі з бацькам плот на дачы з нашай цэглы – якасны! Спецыяльнай адукацыі ў мяне не было, усяму вучыўся прама ў цэху. Калектыў добры, праца не самая складаная і добра аплачваецца. Пагадзіцеся, у маім узросце атрымліваць стабільную зарплату, якой хапае не толькі на бягучыя выдаткі, але і на мару, выдатна. Я пачаў збіраць на ўласную кватэру. Сябры па-добраму зайздросцяць і ўжо цікавяцца вакансіямі на прадпрыемстве.

Чаму і цяпер па прадукцыю камбіната стаяць чэргі з фур, тлумачыць намеснік дырэктара ЗАТ «Магілёўскі КСВ» Уладзімір Сычыкаў:

– У пачатку года на знешніх рынках рэзка вырас попыт на сценавыя блокі з ячэістага бетону. Да прыкладу, у Расійскай Федэрацыі цэны на іх падскочылі ў 2,9 раза. Улічваючы кан’юнктуру рынку, пры адгрузцы мы неаднаразова павялічвалі адпускныя кошты ў расійскіх рублях. Да таго ж, праз уведзеныя санкцыі ў дачыненні да беларускіх пакупнікоў з Латвіі і Літвы дазволена адгружаць прадукцыю па раней заключаных кантрактах толькі да 4 чэрвеня 2022 года, таму яны імкнуцца атрымаць заяўленыя аб’ёмы цэглы і блокаў у максімальна кароткія тэрміны.

З другога паўгоддзя ў камбіната застанецца адзін рынак збыту – Расія, дзе канкурэнцыя цяпер рэзка ўзмацняецца: таварныя патокі перанакіроўваюць і іншыя беларускія прадпрыемствы. Таму Магілёўскі камбінат сілікатных вырабаў актыўна шукае шляхі, як удасканаліць тэхналогіі і скараціць выдаткі вытворчасці, пры гэтым пашырыць асартымент выпускаемай прадукцыі і палепшыць спажывецкія ўласцівасці. Істотнай дапамогай стане і рэалізуемы інвестыцыйны праект, які дазволіць павялічыць вытворчасць на 24 працэнты, да 71 мільёна штук сілікатнай цэглы ў год. На заводзе з’явіцца высокапрадукцыйны гідраўлічны прэс нямецкай фірмы Lasco з аўтаматам-укладчыкам, таксама ўстановяць аўтаматызаваную лінію ўпакоўкі сілікатнай цэглы з італьянскімі і нямецкімі машынамі. Акрамя таго, КСВ набывае дадатковую тэхніку для дастаўкі сыравіны, транспарціроўкі і адгрузкі гатовай прадукцыі.

Кантракты на пастаўку новага абсталявання выконваюцца, асноўная частка машын і прыстасаванняў ужо манціруецца. Па словах намесніка дырэктара Уладзіміра Сычыкава, увядуць у эксплуатацыю асноўнае тэхналагічнае абсталяванне ў чэрвені:

– У сувязі з рэзкімі геапалітычнымі зменамі ўзнікалі пэўныя складанасці ў рэалізацыі праекта, але прадпрыемства нацэлена завяршыць яго ў поўным аб’ёме. Пытанне адмаўлення ад выканання або замарозкі праекта не разглядаецца.

СБ