Музей Масленікава запрашае 10 лістапада на выставу «3/4 стагоддзя»

Адкрыццё выставы выпускнікоў Мінскага дзяржаўнага каледжа імя А. К. Глебава «3/4 стагоддзя» адбудзецца ў Магілёўскім абласным мастацкім музеі імя П. В. Масленікава 10 лістапада. Пачатак мерапрыемства запланаваны на 16.00, пра што паведамілі ва ўстанове культуры.

У экспазіцыі будуць прадстаўлены творчыя работы выпускнікоў каледжа ў такіх відах выяўленчага мастацтва, як жывапіс, графіка, скульптура. Работы выпускнікоў каледжа адлюстроўваюць шырокі спектр творчых стыляў і кампазіцыйных схем, увага да колеру, тону, прасторавай глыбіні, пластычнасці, яркай вобразнасці.

Як расказалі ў музеі, з моманту заснавання Мінскага дзяржаўнага мастацкага вучылішча імя А. К. Глебава прайшло тры чвэрці стагоддзя. За гэты час навучальная ўстанова набыла статус адной з вядучых устаноў сярэдняй спецыяльнай адукацыі мастацкага профілю краіны. Менавіта тут атрымалі свае першыя ўрокі прафесійнага майстэрства такія народныя мастакі Беларусі, як Міхаіл Савіцкі, Май Данцыг, Віктар Грамыка, Арлен Кашкурэвіч, Леанід Шчамялёў, Георгій Паплаўскі, Іван Місько, Васіль Шаранговіч.

Азнаёміцца з творчасцю выпускнікоў мінскага каледжа можна будзе да 10 снежня.

Рэд.