На дрэваапрацоўчым прадпрыемстве РУП «Завод газетнай паперы» штогод выпускаюць да 250 дамакамплектаў

Хутка, стыльна, экалагічна

РУП «Завод газетнай паперы» ў Шклове вядомае як адзін з асноўных вытворцаў папяровай прадукцыі ў краіне. Разам з тым развіваюць тут і іншы напрамак – выпуск драўляных дамоў. Магутнасць дрэваапрацоўчай вытворчасці – да 250 дамакамплектаў на год. Больш за 70 працэнтаў з іх сёння адпраўляецца ў Расію, у зусім невялікай колькасці – у краіны Еўрасаюза, астатнія 20 працэнтаў у прадажах дамоў прыпадаюць на долю ўнутранага рынку. Зрэшты, гэта прапорцыя нясталая і вагаецца ў залежнасці ад сітуацыі ў краіне і за яе межамі. Так, на прадпрыемстве чакаюць, што пасля анансаваных зменаў у падыходах да драўлянага домабудавання на сяле і нарошчвання тэмпаў жыллёвага крэдытавання попыт з боку суайчыннікаў на шклоўскую прадукцыю прыкметна вырасце.

Начальнік упраўлення па рэалізацыі, будаўніцтве дамоў і малых архітэктурных формаў прадпрыемства Ала Кузьмянкова ўводзіць у курс справы:

– Наша вытворчасць заснавана ў 2009 годзе. Для яе мы закупляем піловачную сыравіну на таргах Беларускай універсальнай таварнай біржы і самі яе перапрацоўваем. У першую чаргу яна ідзе на выпуск піламатэрыялаў – гэта да 20 працэнтаў нашага таварнага прадукту. Астатні аб’ём піламатэрыялаў у сябе ж пускаем у справу: на паганажныя вырабы, хаты з клеенага бруса і каркасна-панэльныя хаты, лазні, альтанкі. На вытворчасць дамоў з клеенага бруса ідзе 20–30 працэнтаў уласных піламатэрыялаў, яшчэ 15 працэнтаў – на вытворчасць каркасна-панэльных дамоў. Гадавы аб’ём вырабу першых у залежнасці ад канчатковай плошчы дасягае прыкладна 50 домакамплектаў, другіх – каля 200.

Чаму пакупнікі звяртаюць увагу на варыянты драўляных дамоў? Па-першае, яны не патрабуюць збудавання магутнага і дарагога падмурка, тлумачыць спецыяліст. Па-другое, такія драўляныя дамы лёгка і хутка ўзводзяцца: каробка каркасна-панэльных збіраецца за 5-7 дзён, дамоў з клеенага бруса – да трох тыдняў. Пры жаданні заказчыка супрацоўнікі завода гатовы выехаць на месца і дапамагчы ў працах. Не складзе вялікай працы і самому ўсё сабраць, галоўнае – разбірацца ў дакументацыі. Бо канструкцыя нагадвае лега, дзе кожны элемент мае свой нумар і месца. Па-трэцяе, цяпер кошт драўляных дамоў знізіўся з-за патаннення кошту лесаматэрыялаў у параўнанні з мінулым годам, калі цэннік на біржы біў рэкорды. Па-чацвёртае, ад моманту выбару макета з ліку наяўных на прадпрыемстве да вырабу праходзіць максімум месяц.

– Пакупнік можа выбраць праект з ужо наяўных у нас або прапанаваць свой, нават намаляваны ад рукі на лісце паперы. Важна таксама разуменне таго, як павінен выглядаць дом. У нашым канструктарскім аддзеле ёсць спецыяльныя праграмы па распрацоўцы праектаў драўляных дамоў, у саміх спецыялістаў, што немалаважна, за плячыма вопыт і разуменне таго, што мы ў стане зрабіць. Дарэчы, сучаснае перадавое абсталяванне дазваляе не толькі з высокай дакладнасцю вырабляць дэталі будучага дома, але і вар’іраваць таўшчыню сцен у выпадку з дамамі з клеенага бруса ў вялікім дыяпазоне, ад 80 да 250 міліметраў. Акрамя таго, мы адзіныя ў краіне вырабляем модныя зараз фахверкавыя дамы, якія складаюцца са шкілета, выкананага з клеенага бруса, запоўненага уцяпляльнікам. Па кошту яны выходзяць таннейшымі за брус, але крыху даражэйшымі і цікавейшымі візуальна ў параўнанні з каркасна-блочнымі, – адзначае Ала Кузьмянкова.

Па словах прадстаўніка завода, часцей за ўсё пакупнікі цікавяцца невялікімі дамамі, плошчай 90–120 квадратных метраў. У нашай краіне такія прывабліваюць шматдзетных, у асноўным тых, хто жадае пабудавацца ў Мінскім раёне, а таксама землякоў з Магілёўскай вобласці.

– Заўважылі: попыт на нашы дамы ёсць з боку вялікіх сем’яў. Як правіла, час будаўніцтва жылля яны хочуць па максімуме скараціць, пры гэтым робяць акцэнт на экалагічнасць матэрыялаў будучага дома. Немалаважную ролю адыгрывае магчымасць выкарыстання сямейнага капіталу пры куплі, а таксама даступнасць крэдытавання на дадатковыя метры. Разам з тым мы ўважліва сочым і за выкананнем даручэння Прэзідэнта, які на нядаўняй нарадзе вярнуўся да тэмы зніжэння коштаў на драўніну для будаўніцтва жылля на вёсцы. Калі трэба будзе, мы гатовы падставіць плячо, – падкрэслівае суразмоўца.

СБ