Паспяховы вопыт па стварэнні мехатрадаў у Магілёўскай вобласці атрымае развіццё

Праца мехатрадаў сёлета стала адным з фактараў своечасовай сяўбы і ўборкі збожжавых культур. У цяперашні час ужо ў працы такія ж падраздзяленні па корманарыхтоўцы.

Два мабільныя мехатрады ААТ «Задняпроўскі міжрайаграсэрвіс» на гэтым жніве спрацавалі, як хуткая дапамога. У адным атрадзе шэсць камбайнаў, палова новыя, а астатнія сабралі са спісанай тэхнікі. Кожны з камбайнаў намалаціў не менш за 1000 тон. У другім – 10 энерганасычаных трактароў, якія былі занятыя на ўзворванні. Гэта тэхніка набывалася з дапамогай абласнога і рэспубліканскага бюджэтаў. Як адзначылі ў Камітэце па сельскай гаспадарцы і харчаванні Магілёўскага аблвыканкама, дзякуючы такім мехатрадам з вопытнымі механізатарамі ўдалося не толькі своечасова і без страт сабраць ураджай, але і ў тэхналагічныя тэрміны пасеяць азімы рапс і азімы ячмень. Таму ўжо да наступнага сезона палявых работ плануецца павялічыць колькасць адзінак тэхнікі. На базе ААТ «Задняпроўскі міжрайаграсэрвіс» вядзецца праца па стварэнні мехатрада па нарыхтоўцы кармоў, які будзе аснашчаны 3-4 сучаснымі сянажнымі комплексамі. Яны будуць дапамагаць адстаючым сельгаспрадпрыемствам вобласці.

Рашэннем Магілёўскага аблвыканкама дадаткова створана 7 мехатрадаў, закуплена 13 сучасных высокапрадукцыйных камбайнаў. З верасня гэтыя падраздзяленні ўжо прыступілі да работ на базе райаграсэрвісаў. Іх колькасць плануецца павялічыць.

СБ