Пасяўная кампанія на Магілёўшчыне блізкая да завяршэння. На падыходзе сезон корманарыхтовак

Некаторыя гаспадаркі ўжо пачалі нарыхтоўваць сянаж з палосных пасеваў, якія падаспелі. Аграномы ў больш спакойным рэжыме будуюць графікі агратэхнічных аперацый, каб пасевы выраслі ў шчодры ўраджай. Халоднае надвор'е паставіла на паўзу і хімпраполку – для ўнясення гербіцыдаў пакуль нізкія тэмпературы. З-за холаду і ўсходаў давядзецца чакаць даўжэй. Але земляробы не сядзяць склаўшы рукі.

Пракаментавала аператыўную зводку на 13 мая начальнік упраўлення інтэнсіфікацыі раслінаводства і меліярацыі аблсельгасхарча Лілія Гулінская:

– Высеяны сельскагаспадарчыя культуры на 86% плошчаў. Справіліся гаспадаркі вобласці з пасадкай бульбы. Працягваем сеяць грэчку, проса, сою. Ужо пасеялі 63% агароднінных культур.

Пасеяна больш за 116 тысяч гектараў кукурузы – гэта 77% ад запланаванага. Бліжэй за ўсіх да завяршэння два раёны: 97% кукурузных плантацый засеялі ў Краснапольскім і 92% – у Горацкім. Астатнія раёны таксама блізкія да фінішнай прамой кукурузнай сяўбы. І толькі асіповіцкія земляробы адстаюць – там засеяна толькі 48% да задання.

Для агранамічных службаў гаспадарак наступіў, умоўна кажучы, рэжым перадышкі. Многія гаспадаркі выкарыстоўваюць гэты час з карысцю – працягваюць вясновворку, сеюць аднагадовую і шматгадовую траву, займаюцца перазалужэннем пашавых угоддзяў. Напрыклад, у Бабруйскім раёне аднагадовая трава ўжо пасеяна на 120% запланаваных плошчаў, у Быхаўскім план перавыканалі на 21%, у Крычаўскім – на 13, у Асіповіцкім – на 12, а ў Клімавіцкім – на 73%. Усяго ў вобласці вяснапашка праведзена на плошчы 116,8 тысячы гектараў, што складае 114% да задання.

 zilmogilev.by