Прадукцыя з сімволікай II Гульняў краін СНД хутка з'явіцца ў продажы па ўсёй Беларусі

Прадукцыя з сімволікай II Гульняў краін СНД хутка з'явіцца ў продажы па ўсёй Беларусі. Аб гэтым расказала старшыня канцэрна «Беллегпрам» Таццяна Лугіна падчас пасяджэння арганізацыйнага камітэта па забеспячэнні падрыхтоўкі і правядзення ў Беларусі II Гульняў краін СНД, паведамілі карэспандэнту ў прэс-службе ўрада.

У час пасяджэння асаблівая ўвага была ўдзелена пытанню вырабу і рэалізацыі прадукцыі з сімволікай Гульняў. Таццяна Лугіна адзначыла, што такая прадукцыя ўжо ёсць у продажы ў фірменных магазінах сеткі, а ў самы бліжэйшы час з'явіцца ў продажы паўсюдна.

Міністр спорту і турызму Сяргей Кавальчук і намеснікі старшыняў аблвыканкамаў, Мінскага гарвыканкама далажылі намесніку прэм'ер-міністра Ігару Петрышэнку аб выніках правядзення тэставых спаборніцтваў, на якіх праверана гатоўнасць фізкультурна-спартыўных збудаванняў, работа судзейскага корпуса і валанцёрскай групы.

Намеснік міністра аховы здароўя Аляксандр Тарасенка расказаў аб медыцынскім забеспячэнні ўдзельнікаў і гасцей Гульняў, а таксама санітарна-эпідэміялагічным маніторынгу аб'ектаў, задзейнічаных у правядзенні Гульняў.

Першы намеснік міністра культуры Валерый Грамада далажыў аб арганізацыі ўрачыстых цырымоній адкрыцця і закрыцця Гульняў, у тым ліку аб уключэнні ва ўрачыстыя цырымоніі большай колькасці прывабных для гледача тэхналагічных рашэнняў і тэхнічных навінак.

Таксама на пасяджэнні аргкамітэта было разгледжана пытанне аб арганізацыі работы валанцёраў у рамках Гульняў, іх харчаванні, пражыванні, размеркаванні па функцыянальных напрамках дзейнасці.

БЕЛТА