«Развіццё спорту ў малых гарадах важна для будучых перамог». Трэнер на сустрэчы з прэзідэнтам НАК у Шклове

Развіццё спорту ў малых гарадах важнае для будучых перамог. Такім меркаваннем падзяліўся трэнер-выкладчык па вольнай барацьбе СДЮШАР Шклоўскага раёна Пётр Табуноў у час сустрэчы выхаванцаў школы з прэзідэнтам Нацыянальнага алімпійскага камітэта Беларусі Віктарам Лукашэнкам.

Пётр Табуноў - трэнер з 40-гадовым стажам работы, які выхаваў некалькі пакаленняў спартсменаў. Сёння ўжо яго былыя вучні прыводзяць на заняткі ў школу сваіх дзяцей і ўнукаў. «Я працую вельмі даўно - з 1984 года, і за гэты час вырасла не адна плеяда добрых спартсменаў і проста дастойных людзей, якія прайшлі праз нашы рукі, - дзеліцца ён. - Самае галоўнае, што мы папулярызуем сярод дзяцей здаровы лад жыцця, гарманічна развіваем асобу, каб быў баланс паміж разумовым і фізічным. Вядома ж, не ўсе стануць чэмпіёнамі, але прывіваць любоў да спорту важна. У гэтым пытанні важныя веды псіхалогіі, бо да падрастаючага пакалення патрэбен асаблівы падыход».

На думку трэнера, спорт павінен развівацца не толькі ў вялікіх гарадах, але і ў маленькіх населеных пунктах: «Спартыўныя школы павінны жыць – папаўняцца дзецьмі і маладымі трэнерамі, падмацоўвацца нашым шматгадовым досведам і майстэрствам. Дзіцяці абавязкова трэба залучаць у спартовае жыццё, гэта для яго важны складнік. Тым больш, спорт дысцыплінуе. Узяць прызёра Алімпійскіх гульняў па жаночай барацьбе Ірыну Курачкіну, якая сёння на сустрэчы падарыла дзецям майстар-клас. Яна ўвесь час трымае сябе ў тонусе, працуе над сабой і рухаецца наперад. І гэта цудоўны прыклад для хлопцаў. Вядома ж, не ўсе змогуць дабіцца яе перамог, але ж не гэта галоўнае. У будучыні многія нашы выхаванцы стануць добрымі электрыкамі, вадзіцелямі, будаўнікамі… І гэта важна, бо фізічна і маральна падрыхтаваны да жыцця чалавек - вельмі моцны».

Пётр Табуноў упэўнены, што дзіця на шляху да спорту - аматарскага або вялікага - заўсёды важна падтрымаць, выклікаць у яго цікавасць. «Турнік, брусы, бег, гімнастыка, акрабатыка – усё гэта развівае дзяцей, і абавязкова спатрэбіцца ім у жыцці, – упэўнены трэнер. - Больш за тое, гэта загартуе дзіця, выхавае ў ім унутраную сілу і характар».

У СДЮШАР Шклоўскага раёна сёння налічваецца сем аддзяленняў (хакей, футбол, лёгкая атлетыка і іншыя), дзе займаецца каля 700 чалавек - дзеці ва ўзросце ад 8 гадоў і старэйшыя. Вольнай барацьбой тут займаюцца 74 чалавекі - не толькі жыхары Шклова, але і найбліжэйшых раёнаў. Аб высокім узроўні падрыхтоўкі ў школе гаворыць наяўнасць сярод былых выхаванцаў прызёраў Еўропы і чэмпіянатаў свету. Напрыклад, майстар спорту міжнароднага класа, бронзавы прызёр Чэмпіянату свету па барацьбе вольнай Наталля Шынкарова; прызёр чэмпіянату Еўропы і Еўрапейскіх гульняў, член зборнай нацыянальнай каманды, майстар спорту міжнароднага класа Вераніка Іванова; прызёры Еўропы па кадэтах, моладзі і юніёрах.

«Мы развіваемся, а дзяржава і Беларуская федэрацыя барацьбы адносіцца да нас з вялікай увагай - дапамагаюць ва ўмацаванні матэрыяльна-тэхнічнай базы, арганізацыі і правядзенні мерапрыемстваў, - працягнуў Пётр Табуноў. - Гэта і абмундзіраванне, і інвентар, і новае татамі, на якім сёння трэніруюцца нашы дзеці. Для малых гарадоў такая дапамога вельмі важная, бо найперш гэта робіцца для дзяцей і іх развіцця, для нашых будучых перамог і спартыўных дасягненняў. Ёсць у гэтым і трэнерская заслуга, таму вельмі прыемна, калі праз гады выпускнікі не забываюцца і дзякуюць за той уклад, які быў зроблены ў іх выхаванне і спартыўнае жыццё. Калі цябе памятаюць, гэта дарагога каштуе».

БЕЛТА