РУП «Завод газетнай паперы» плануе нарасціць выпуск паперы-асновы для дэкаратыўных абліцовачных матэрыялаў

У 2022 годзе РУП «Завод газетнай паперы» плануе нарасціць выпуск паперы-асновы для дэкаратыўных абліцовачных матэрыялаў у 2,5 разы. Такія даныя падчас інтэрв’ю карэспандэнту sb.by агучыў старшыня канцэрна «Беллеспаперапрам» Міхаіл Касько.

– Сёння ў краіне дзейнічае пяць прадпрыемстваў, для якіх светлагорская цэлюлоза – сыравіна. Напрыклад, РУП «Завод газетнай паперы» асвоіла вытворчасць паперы-асновы для дэкаратыўных абліцовачных матэрыялаў, якія выкарыстоўваюцца для друку і наступнага ламінавання драўняных пліт, у якасці дэкаратыўнага пласта для гэтых пліт, а таксама ў якасці пласта стабілізацыі пры выпуску падлогавых пакрыццяў. Аб’ёмы выпуску паступова павялічваюцца. У 2021 годзе на новай папераробнай машыне было выраблена ў цэлым 24,4 тысячы тон паперы розных відаў, у тым ліку афсетнай, мяшочнай і каля 10 тысяч тон паперы-асновы для дэкаратыўных абліцовачных матэрыялаў. У 2022 годзе запланавана да выпуску 25,6 тысячы тон гэтай паперы, гэта значыць у 2,5 разы больш. Бо менавіта дзеля гэтай прадукцыі рэалізоўваўся праект, плюс на яе вытворчасці ўтворыцца самая вялікая дабаўленая вартасць, – увёў у курс справы Касько.

СБ