Семінар па абмеркаванні пытанняў экспарту ў краіны ЕС прайшоў у Магілёве

Анлайн-семінар «Экспарт у ЕС ва ўмовах санкцый на прыкладзе Італіі» адбыўся ў камітэце эканомікі Магілёўскага аблвыканкама пры ўдзеле Часовага Паверанага ў справах Беларусі ў Італіі Кірыла Пятроўскага. Удзел у ім прынялі арганізацыі і прадпрыемствы, прадстаўнікі райвыканкамаў Магілёўскай вобласці.

«Вядома, у сённяшніх умовах у нашых прадпрыемстваў ёсць пытанні, якія хацелася б растлумачыць для выбудоўвання эфектыўнай працы. У першую чаргу, гэта датычыцца перспектыў экспарту прадукцыі дрэваапрацоўчай галіны ў ЕС, правядзення плацяжоў, выбудоўвання лагістыкі, - адзначыў намеснік старшыні камітэта эканомікі аблвыканкама Павел Марыненка. - Зацікаўлены ў пошуку патэнцыйных партнёраў у Італіі многія прадпрыемствы, у тым ліку, ААТ «Магілёўдрэў», ААТ «Клімавіцкі лікёра-гарэлачны завод», ААТ «Ольса».

Павел Марыненка выказаў упэўненасць, што правядзенне такіх семінараў акажа істотную дапамогу арганізацыям у прасоўванні сваёй прадукцыі на рынак Італіі і ў цэлым у краіны ЕС.

Юлія Таранава, фота Галіны Гаўрыловіч