Торфапрадпрыемства «Дняпроўскае» ў Быхаўскім раёне завяршае мадэрнізацыю брыкетнай вытворчасці

Торфапрадпрыемства «Дняпроўскае» ў Быхаўскім раёне завяршае мадэрнізацыю брыкетнай вытворчасці. Пра гэта паведаміў дырэктар адкрытага акцыянернага таварыства Вадзім Паўловіч.

«Мадэрнізацыя ў першую чаргу дала прадпрыемству надзейнасць і бесперабойнасць у працы, – растлумачыў Вадзім Паўловіч. – Плюс да ўсяго, мы арыентаваліся на энергазберажэнне, Стварэнне бяспечных умоў працы і недапушчэнне вытворчага траўматызму, бо капітальны рамонт завода не праводзіўся каля шасці дзесяцігоддзяў, з часу яго пабудовы. Сярод асноўных выкананых работ – замена латковых эстакад і размеркавальнага транспарцёра над прэсамі, мадэрнізацыя лініі падрыхтоўкі торфу і тэхналагічнага абсталявання вагонаапракідвальніка, рамонт склада гатовай прадукцыі і кацельнага абсталявання. Прычым усе гэтыя працы, як бы цяжка ні было, выконваліся без спынення вытворчасці».

Па словах дырэктара, за гады эксплуатацыі многія прылады і механізмы знасіліся настолькі, што іх стан быў не проста дрэнным, а жахлівым. Спатрэбілася нямала часу, сіл і ўкладанняў, каб прывесці іх у парадак і наладзіць бесперабойную працу. Так, цалкам замененыя латковыя эстакады, па якіх пасля прэсавання праходзіць брыкет. Да іх мадэрнізацыі прыступілі ў сакавіку. Цяпер гэта зусім новая канструкцыя, адпаведная сучасным тэхналагічным рашэнням і патрабаванням. У эстакады выкладзены вялікі аб’ём металу, сабраны новы транспарцёр, усталявана сістэма аўтаматыкі. Ужо завяршаюцца пусканаладачныя работы.

Значны рамонт спатрэбіўся і брыкетнаму цэху. Да гэтага пытання на прадпрыемстве падышлі комплексна: узмацнілі канструкцыі сцен і аднавілі іх апорныя здольнасці, адрамантавалі дах, уцяплілі фасады, замянілі вокны і дзверы. Рамонт закрануў таксама інжынерныя сеткі: водаправод, ацяпленне, каналізацыю і электраправодку. На прадпрыемстве паправілі абсталяванне кацельні, уцяплілі параправод, капітальна адрамантавалі адзін з катлоў і правялі яго рэжымна-наладачныя выпрабаванні. У далейшым гэта дазволіць аптымізаваць расход паліва і электраэнергіі. «Эфектыўнасць перш за ўсё», – падкрэсліў дырэктар.

Асаблівая ўвага нададзена і санітарна-бытавым умовам. У гэтым годзе бытавая частка брыкетнага цэха набыла зусім новы і дагледжаны выгляд: адрамантаваны гардэробы, душавыя, санвузлы, пакоі прыёму ежы, хол і лесвічны марш, дзе выкладзеная новая плітка і замененыя парэнчы. Таксама ў памяшканні – новыя вокны і дзверы. Усё чыста і акуратна. «Гэта павышае вытворчую культуру: людзі бачаць такія ашаламляльныя перамены і ацэньваюць іх станоўча, – працягнуў Вадзім Паўловіч. – У свой час вёска Гадылёва вырасла вакол прадпрыемства: практычна ў кожнай сям’і ёсць чалавек, чыя працоўная дзейнасць з ім звязана. Калі працуе вытворчасць, завод не стаіць на месцы і развіваецца, людзі ўпэўнена глядзяць у заўтрашні дзень – няма прычын хвалявацца: будуць працоўныя месцы, будзе і заробак».

На мадэрнізацыю выдзелены сродкі з пазабюджэтнага фонду Міністэрства энергетыкі. Асноўная частка мадэрнізацыі завершыцца ў 2021 годзе, на наступныя гады застанецца сістэма абяспыльвання сушылак, добраўпарадкаванне тэрыторыі. Акрамя таго, на сённяшні дзень на разглядзе знаходзіцца пытанне аб будаўніцтве новай энергакрыніцы. У 2022 годзе запланаваны ўвод 100 га зноў пабудаваных палёў торфаздабычы. Па словах Вадзіма Паўловіча, роля галіновага ведамства і галаўнога прадпрыемства ў развіцці вытворчасці пераацаніць цяжка: дзякуючы ўвазе і падтрымцы з боку Міністэрства энергетыкі і ДВА «Белпалівагаз» ААТ «Торфапрадпрыемства “Дняпроўскае”» атрымала новы штуршок у развіцці і паступальна рухаецца наперад.

«Сёння пазітыўны ўздым перажывае ўся тарфяная галіна краіны, – падкрэсліў Вадзім Паўловіч. – Шмат у чым гэта звязана з паспяховай рэалізацыяй Дзяржаўнай праграмы «Торф». Маштабнае абнаўленне прайшло амаль на ўсіх торфазаводах, што забяспечыла бесперабойную працу вытворчасці, знізіла выдаткі і дапамагло наладзіць выпуск неабходнага аб’ёму прадукцыі. У канчатковым выніку ўсё гэта ўплывае на павышэнне эфектыўнасці, рэнтабельнасці і якасці выпускаемай прадукцыі. Гэта асабліва актуальна ў перыяд, калі на сусветным рынку цэны на энергакрыніцы істотна пайшлі ўверх. Павысіўся попыт і на нашу прадукцыю як мясцовы від паліва. Адыграла сваю ролю і леташняя зіма – працяглы перыяд халадоў прымусіў людзей сёлета зрабіць грунтоўныя запасы паліва. Дзякуючы вышэйпералічанаму аб’ёмы вытворчасці павялічыліся: на канец года рост складзе каля 30%».

Па словах дырэктара, залог эфектыўнай працы торфапрадпрыемства – гэта не толькі высокія тэхналогіі, але і захаванне тэхналагічнай і вытворчай дысцыпліны. Пасля здабычы торф загружаюць у торфавозныя вагоны і транспартуюць на завод, затым праз вагонаапракідвацель сыравіна трапляе ў падрыхтоўчае аддзяленне, дзе чысціцца ад прымешак і драбніцца да патрэбнай фракцыі. Пасля гэтага па галерэі 2-га ўздыму падаецца на транспарцёр і, праходзячы над сушылкамі, набывае неабходную вільготнасць – 16–18%. Затым «тарфяная сушынка» прэсуецца і трапляе на латковыя эстакады, якія служаць для астуджэння брыкету – гэта дае яму неабходную трываласць. На выхадзе лічыльнікі вядуць улік гатовай прадукцыі, што дазваляе спраўджваць вырабленыя і адгружаныя аб’ёмы.

«Наша прадукцыя праходзіць пастаянны лабараторны кантроль: згодна з СТБ, у брыкетаў павінна быць нарматыўная попельнасць, вільготнасць і каларыйнасць, – звярнуў увагу Вадзім Паўловіч. – Вытворчасць працуе кругласутачна, людзі працуюць у 3 змены. Агульная колькасць усіх работнікаў складае амаль 180 чалавек. Ад гэтага завода залежыць жыццё цэлага населенага пункта, да нас на працу прыязджаюць нават быхаўчане».

ААТ «Торфапрадпрыемства “Дняпроўскае”» – адзіны вытворца паліўных брыкетаў у Магілёўскай вобласці. Тут функцыянуюць брыкетны і транспартны цэхі, а таксама 2 участкі здабычы торфу. Асноўным рынкам збыту прадукцыі з’яўляецца Магілёўская вобласць. Амаль 67% брыкету рэалізуецца прадпрыемствам і арганізацыям рэгіёна, больш за 33% – насельніцтву. Магутнасць складае звыш 100 тыс. т брыкету на год. Прадпрыемства таксама развівае няпаліўную групу тавараў – вытворчасць кампаставаных пажыўных тарфяных грунтоў і торфазольных сумесяў. Гэта прадукцыя шырока выкарыстоўваецца ў сельскай гаспадарцы, лясной прамысловасці (для вырошчвання ў гадавальніках лесапасадачнага матэрыялу), а таксама пры правядзенні работ па добраўпарадкаванні тэрыторый.

БЕЛТА