У Магілёве ўшаноўвалі пераможцаў і прызёраў чэмпіянату Еўропы па барацьбе і «Лігі адважных»

У Магілёве ўшаноўвалі пераможцаў і прызёраў чэмпіянату Еўропы па барацьбе, які прайшоў у лютым гэтага года ў Румыніі, іх трэнераў, а таксама трэнераў каманд-пераможцаў другога сезона спаборніцтваў па барацьбе «Ліга адважных»

У падрыхтоўцы спартсменаў і да еўрапейскіх стартаў, і да «Лігі адважных» прымаў удзел старшы трэнер юніёрскай зборнай Беларусі па жаночай барацьбе, трэнер Магілёўскага дзяржаўнага вучылішча алімпійскага рэзерву Сяргей Мялькоў. Трэніраваць жаночую каманду, гаворыць ён, справа няпростая. «З дзяўчынкамі, напэўна, крыху больш складана, чым з хлопчыкамі, а ў чымсьці, наадварот, лягчэй. Тут больш псіхалогія патрэбна, бо нехта можа быць залішне ўпэўнены ў сабе, а нехта наадварот, - распавёў ён. - Высокія вынікі паказваюць Алеся Гетманава і Вераніка Іванова, дзве дзяўчынкі - прызёркі чэмпіянату свету (ім прысвоілі званні майстроў спорту Рэспублікі Беларусь міжнароднага класа) - гэта Вікторыя Радзькова і Аліна Шаўчук. Аліна пасля ІІ Гульняў краін СНД стала другой на міжнародным старце да 23 гадоў. Яна - самая маладая ў нашай камандзе. Нядаўна выйшла з кадэтаў, зараз актыўна праяўляе сябе, знаходзіцца ў штаце нацыянальнай зборнай. І калі ўсё атрымаецца, яна будзе змагацца ў апошнім ліцэнзійным турніры і таксама паспрабуе атрымаць ліцэнзію на Алімпійскія гульні».

Як расказаў трэнер, усе дзяўчынкі ў камандзе - класныя. «Мінулая «Ліга адважных» паказала, што ў нас шмат маладых. На сённяшні дзень ёсць шмат дастойных спартсменаў, у нас хочуць займацца, - расказаў ён. - Будучыня ў гэтым відзе спорту ёсць. Цікавасць да яго падагравае і тое, што «Лігу адважных» паказвалі па тэлевізары, шмат пісалі ў прэсе. Тым больш у нашых магілёўскіх спартсменаў два алімпійскія медалі, яны на ўсіх плакатах, яны знакамітасці. Гэта таксама падаграе цікавасць і зацікаўленасць».

Паводле слоў Сяргея Мялькова, у жаночую барацьбу прыходзяць дзяўчынкі з розных куткоў рэгіёну: абласнога цэнтра, раёнаў - Быхаўскага, Шклоўскага, Магілёўскага і інш.

«Я ўпэўнены, у нас наперадзе яшчэ нямала перамог, - рэзюмаваў ён. - Ёсць неабходнасць у паляпшэнні матэрыяльна-тэхнічнай базы, але я думаю, што і ў гэтым пытанні будуць зрухі. Бо наш від спорту папулярны ў моладзі, мы паказваем высокія вынікі».

Як падкрэсліў начальнік упраўлення спорту і турызму Магілёўскага аблвыканкама Сяргей Новікаў, вобласць заўсёды ганарыцца сваімі спартсменамі. «Магілёўская абласная федэрацыя барацьбы паказвае свой узровень вынікамі на міжнародных спаборніцтвах, ліцэнзіямі, якія заваёўваюць нашыя спартоўцы на Алімпійскія гульні. Мы стараемся іх адзначаць на ўзроўні федэрацыі, упраўлення спорту і турызму. Праводзіцца ўся неабходная падрыхтоўка, вучэбна-трэніровачныя зборы. Гэта ўсё гаворыць аб увазе да гэтага віду спорту», - адзначыў ён.

БЕЛТА