У Магілёве завяршыўся адкрыты Кубак Беларусі па лёгкай атлетыцы ў памяшканні

У спартыўным комплексе «Алімпіец» у Магілёве завяршыўся адкрыты Кубак Беларусі па лёгкай атлетыцы ў памяшканні, паведамілі ў прэс-службе БФЛА.

Кубак Беларусі ў памяшканні - другі па значнасці нацыянальны старт зімовага лёгкаатлетычнага сезона. Напярэдадні ў Магілёве сабраліся наймацнейшыя спартсмены краіны, якія вызначылі ўладальнікаў 28 камплектаў узнагарод (па 14 у мужчын і жанчын). Пераможцамі турніру ў выніку сталі наступныя лёгкаатлеты:

60 м: Максім Грабарэнка і Яніна Луцэнка;

60 м з бар'ерамі: Віталь Парахонька і Эльвіра Грабарэнка;

200 м: Даніла Глузд і Яніна Луцэнка;

400 м: Міхаіл Міхноўскі і Ганна Міхайлава;

800 м: Дзмітрый Савін і Лізавета Шыманец;

1500 м: Вячаслаў Скудны і Таццяна Шабанава;

3000 м: Уладзіслаў Церашонак і Ірына Канаваленка;

3000 м з перашкодамі: Дзмітрый Іваненка і Таццяна Шабанава;

эстафета 4х400 м: мужчыны - Гомельская вобласць, жанчыны - Брэсцкая вобласць;

скачкі з шастом: Дзмітрый Марфушкін і Ірына Жук;

скачкі ў вышыню: Мікіта Данілаў і Карына Дзямідзік;

скачкі ў даўжыню: Уладзіслаў Булахаў і Віялета Скварцова;

трайны скачок: Максім Несцярэнка і Валерыя Іванова;

штурханне ядра: Алег Тамашэвіч і Алена Трус.

Пераможца кубка на дыстанцыі 3000 м з перашкодамі Дзмітрый Іваненка ўстанавіў новы рэкорд Беларусі ў залах - 8:21,05 сек.

Акрамя таго, у гэты ж дзень у Маскве адбыліся XXXIII Міжнародныя спаборніцтвы «Руская зіма», дзе перамогу ў скачках з шастом атрымаў наш Мацвей Волкаў.

Далей мацнейшых лёгкаатлетаў краіны чакае чэмпіянат Беларусі ў памяшканні, які з 16 па 18 лютага таксама прыме Магілёў.

БЕЛТА