Удзельнікам і гасцям II Гульняў краін СНД у Магілёве прапануюць цікавыя турмаршруты для знаёмства з вобласцю

Для гасцей і ўдзельнікаў II Гульняў краін СНД у Магілёве падрыхтавалі насычаныя і цікавыя турыстычныя маршруты, падчас якіх можна будзе не толькі пазнаёміцца з багатай гісторыяй краю, але і атрымаць асалоду ад яго прыгажосці. Пра гэта распавяла дырэктар ДКУП «Магілёўаблтурыст» Алена Карпенка.

«Ужо зусім хутка наша краіна будзе прымаць маштабныя спартыўныя спаборніцтвы - II Гульні краін СНД. Адным з гарадоў, дзе будуць праходзіць спаборніцтвы, стане і Магілёў. Вядома, мы чакаем, што да нас прыедзе вялікая колькасць гасцей: удзельнікі і турысты. Рыхтуецца горад не толькі ў частцы спартыўных баз і месцаў размяшчэння. З нашага боку вельмі хочацца, каб кожны госць пазнаёміўся з нашым горадам і вобласцю, даведаўся пра яго гісторыю і прыгожыя мясціны. Для гэтага мы падрыхтавалі разнастайныя турыстычныя маршруты з экскурсіямі па самых знакамітых мясцінах Магілёўшчыны», - сказала яна.

Як адзначыла Алена Карпенка, турмаршруты маюць розную працягласць па колькасці дзён знаходжання. Наведаць экскурсіі можна будзе як групай, так і індывідуальна.

Так, арганізаваныя групы змогуць пазнаёміцца з памятнымі мясцінамі абласнога цэнтра, даведацца пра гісторыю развіцця Магілёва ў розныя гістарычныя перыяды, наведаць храмы горада, а таксама Музей алімпійскай славы Магілёўскай вобласці. Запланаваны і экскурсіі па рэгіёне: госці змогуць наведаць сапраўднае месца сілы - Блакітную крыніцу пад Слаўгарадам, паглядзець Пацёмкінскі палац у Крычаве, пазнаёміцца з прыгожым горадам Мсціславам і Свята-Успенскім мужчынскім манастыром у Пустынках. Прапануюць турыстам і гістарычны ваяж па рэгіёне, у які ўвойдуць населеныя пункты Боркі, Быхаў, Баркалабава і Дашкаўка.

«Прапануем нашым гасцям наведаць «Агурочную сталіцу» Магілёўскай вобласці – горад Шклоў. У гэты ж турмаршрут уключаны гістарычныя аб'екты ў Ляўках і Александрыі. Запланавана і экскурсія на малую радзіму Прэзідэнта Аляксандра Лукашэнкі. Усе жадаючыя змогуць наведаць архітэктурныя і гістарычныя помнікі нашага рэгіёна па асобным маршруце», - адзначыла дырэктар.

Па прапанаваных турыстычных пакетах на гэты момант пацвердзілі ўдзел больш як 260 турыстаў у складзе арганізаваных груп, у тым ліку з Расійскай Федэрацыі. Таксама ёсць бронь на індывідуальнае наведванне гістарычных і культурных аб'ектаў рэгіёну ад 60 турыстаў. Для іх прапануюць зборныя экскурсіі: пешаходную прагулку і аўтобусную паездку па гістарычным цэнтры Магілёва, наведаць аграсядзібу з каларытнымі беларускімі гульнямі і забавамі, песнямі і жыццём беларускай глыбінкі.

«Магілёўская вобласць багатая не толькі сваёй культурнай і гістарычнай спадчынай. Мы прапануем усім нашым гасцям наведаць фестывалі, якія будуць праходзіць у перыяд спаборніцтваў. Гэта каларытны «Рыцарскі фэст у Мсціслаўлі» 5 жніўня, 6 жніўня прапануем з'ездзіць у Баркалабава, Быхаў і Жыліцкі палацава-паркавы ансамбль, 11 жніўня запросім усіх жадаючых у Клічаў і Усакіна на «Партызанскія сцежкі». А 12 жніўня на Блакітнай крыніцы пройдзе Мядовы спас», - распавяла Алена Карпенка.

Усе спартсмены, якія прыедуць на спаборніцтвы ў Магілёў, таксама стануць удзельнікамі культурнай праграмы.

У час правядзення этапаў па караце і стральбе з лука ў Магілёве для зручнасці турыстаў і гасцей будзе працаваць Інфармацыйны турыстычны цэнтр па адрасе: вул. Ленінская, 13. «Тут нашы госці змогуць атрымаць карту горада, а таксама разнастайныя інфармацыйныя матэрыялы аб турыстычных магчымасцях. Тут жа будуць фармавацца зборныя экскурсіі для індывідуальных удзельнікаў, - адзначыла дырэктар. - Таксама ва ўсіх гасцініцах горада, спартыўных і музейных аб'ектах будзе размешчана інфармацыя аб зборных і рэгулярных экскурсіях для гасцей і балельшчыкаў».

Магілёў падчас ІІ Гульняў краін СНД будзе прымаць спаборніцтвы па двух відах спорту: каратэ і стральбе з лука. Стральба з лука пройдзе на стадыёне «Спартак» 5-9 жніўня, спаборніцтвы па каратэ прыме спартыўны комплекс «Алімпіец» 12-13 жніўня.

БЕЛТА