Ванэса Каладзінская: я прыкладу максімум намаганняў, каб заваяваць алімпійскае золата

«Я шчаслівая, што так доўга ўдаецца заставацца на высокім узроўні. Вельмі хочацца даехаць да Алімпійскіх гульняў. Наперадзе яшчэ шмат складанасцей і нявызначанасць, якія трэба пераадолець, пакуль падрыхтоўка ідзе толькі да Алімпіяды. Складнавата эмацыйна знаходзіцца ў гэтай нявызначанасці, але мы рухаемся толькі наперад, - падзялілася Ванэса Каладзінская. - У вольнай барацьбе я ўжо 20 гадоў. Чэмпіянат свету мінулага года стаў для мяне вельмі важным стартам пасля нараджэння другога дзіцяці. Было няпроста падысці да яго, прыйсці ў пік формы, быць упэўненай, што зможаш рэалізавацца, што будзеш стаяць на пастаменце міжнароднай арэны. І гэта было вельмі эмацыйна для мяне. Нават нягледзячы на тое, што я прайграла. Нават зараз я ўсё яшчэ перажываю, мне хацелася быць лепшай. Мусіць, трэба прыкладаць яшчэ больш намаганняў падчас падрыхтоўкі, каб быць чэмпіёнам. Я спадзяюся, што тых намаганняў, якія я прыкладаю зараз у падрыхтоўцы перад Алімпійскімі гульнямі, будзе дастаткова, каб стаць чэмпіёнкай».

Ванэса Каладзінская падзялілася і пачуццямі, якія адчуваюць беларускія спартсмены, выступаючы на міжнародных стартах у нейтральным статусе: «Гаворачы пра складанасці. Цяпер усё мяняецца непрадказальна. Трэба проста заставацца ўстойлівым у сваім напрамку, у дасягненні мэты. Гэта ўжо ня першы год, калі вакол нас такая нестабільная сытуацыя. Я веру ў сваю спартовую каманду са сваімі трэнерамі, у тых, хто дапамагае мне: лекары, масажысты. Я думаю, што ўсё гэта спрацуе і гэтага будзе дастаткова, - распавяла яна. - Скажу сапраўды, стоячы на пастаменце чэмпіянату Еўропы, я была разгубленая. За столькі гадоў прывыкаеш чуць свой гімн, бачыць свой сцяг. І калі ты бачыш белы квадрацік і чуеш абсалютна іншую музыку, ты знаходзішся ў разгубленасці. Але пры гэтым ты трымаеш у сабе, што ты беларуска, што пра гэта шмат хто ведае і памятае».

Трохразовая чэмпіёнка Еўропы Ірына Курачкіна не змагла прысутнічаць на мерапрыемстве. Літаральна на днях яна вярнулася з чэмпіянату, які праходзіў у Баку. Цяпер спартсменка аднаўляецца. Як расказаў старшы трэнер нацыянальнай каманды па жаночай вольнай барацьбе і асабісты трэнер Ірыны Курачкінай Артур Зайцаў, паспяховае выступленне на чэмпіянаце Еўропы - гэта вынік праведзенай работы. «Мы ўпарта ішлі да гэтай мэты, да атрымання ліцэнзіі на Алімпіяду. Было шмат цяжкасцей, у тым ліку былі сур'ёзныя праблемы са здароўем, Ірына шмат прапусціла. У нас было ўсяго два тыдні на падрыхтоўку, гэта вельмі мала насамрэч. Мы шукалі новыя метады і формы працы, - распавёў ён. - Цяпер Ірына трэба будзе аднаўленне, будзе адпачываць. А потым мы складзем план па падрыхтоўцы да Алімпійскіх гульняў. Праз санкцыі шмат складанасцяў, мы не можам выехаць у Еўропу. Засталося толькі Расія і Азія. Будзем шукаць спарынгі, разглядаем розныя варыянты. Канкурэнцыя на Алімпіядзе будзе сур'ёзная. Але для нас гэта ўжо другія Алімпійскія гульні, Ірына ўжо 12 гадоў у топе. На сённяшні дзень - яна адна з лепшых барацьбітоў у свеце».

У 2020 годзе на Алімпійскіх гульнях у Токіа Ірына Курачкіна ў сваёй вагавой катэгорыі прынесла Беларусі сярэбраны медаль, а Ванэса Каладзінская заваявала бронзу.

Прывітаў спартсменаў начальнік упраўлення спорту і турызму Магілёўскага аблвыканкама, біятланіст і сярэбраны прызёр Алімпійскіх гульняў у Ванкуверы Сяргей Новікаў. І хоць свой запаветны медаль ён атрымаў дастаткова даўно, эмоцыі і адчуванні, якія адчуваюць нашы спартсмены, атрымаўшы пуцёўкі на Алімпіяду, ён у поўнай меры разумее. «У кожным відзе спорту заваёва ліцэнзіі - гэта хвалююча. Ты разумееш, што ты яшчэ на крок наблізіўся да алімпійскага медаля. Гэта значыць, што наперадзе яшчэ шмат працы, шмат падрыхтоўкі, - падзяліўся ён. - Мы спадзяемся, што гэта не апошнія ліцэнзіі, якія заваююць нашы спартоўцы на маючую адбыцца Алімпіяду».

БЕЛТА