Вераніка Іванова выйграла бронзу барцоўскага кантынентальнага форуму

Яшчэ адзін медаль у скарбонку беларускай дэлегацыі 16 лютага паклала ўраджэнка Магілёўскай вобласці Вераніка Іванова, якая выступала ў вагавой катэгорыі да 62 кг на чэмпіянаце Еўропы па барацьбе ў Румыніі. Напярэдадні наша спартсменка дайшла да паўфіналу турніру, дзе пацярпела паражэнне ад прадстаўніцы Нарвегіі Грэйс Булен. Саперніцай Івановай па схватцы за трэцяе месца стала Біргюль Салтанава з Азербайджана, якая прайшла праз суцяшальны турнір. Абедзве дзяўчаты былі даволі актыўныя, правёўшы па некалькі рэзультатыўных прыёмаў, але на рахунку беларускі такіх аказалася больш - у выніку перамога 9:6 і бронзавая ўзнагарода.

 

Таксама ў гэты дзень чэмпіёнкамі Еўропы 2024 года сталі нашы Ванэса Каладзінская (да 53 кг) і Ірына Курачкіна (да 57 кг). Пасля пяці дзён спаборніцтваў у актыве беларускай каманды шэсць медалёў кантынентальнага форуму (2-0-4). Раней на трэцюю прыступку п'едэстала ўзнімаліся Кірыл Маскевіч, Абубакар Хаслаханаў і Алеся Гетманава.