Жаночая зборная па барацьбе на падводзячым зборы ў Магілёве вызначылася са складам на II Гульні краін СНД

Пазмагацца ўволю

Дзяўчаты-вольніцы выступяць у Салігорску 13 жніўня, пакуль каманда трэніруецца ў Магілёве. У залі каля 30 чалавек.

- U23 - практычна і ёсць уся наша нацыянальная зборная: дзевяць з дзесяці катэгорый на Гульнях будуць прадстаўлены асноўнай камандай, - дзеліцца галоўны трэнер Ваграм Аганісян. - Канкурэнцыя высокая, нават канчатковы склад на Гульні СНД стаў зразумелы толькі на днях, пасля кантрольнай сутычкі. Дзяўчыны тытулаваныя, праявілі сябе не толькі на ўзроўні рэспублікі. Яны прызёры і чэмпіёнкі Еўропы сярод юніёраў, кадэтаў і моладзі да 23 гадоў. Толькі для адной самай маладой дзяўчынкі (2005 года нараджэння) гэта будзе першы буйны старт, але яна першы нумар сярод юніёрак і моладзі, другі - сярод жанчын. Не хачу загадваць, але каманда вартая, веру, што яна выступіць добра.

Першы тыдзень зборная прытрымліваецца двухразовай дывановай працы, праводзіць кантрольныя сутычкі, каб максімальна наблізіць абстаноўку да спаборніцкай. З наступнага тыдня нагрузку пачнуць зніжаць. Але перажыванняў хапае. Гамяльчанка Арына Мартынава прызнаецца, што яе перапаўняе пачуццё адказнасці:

- Хваляльна! Спачатку ковід, потым санкцыі, і міжнародныя выступленні ўсталі на паўзу. Добра, трэнеры, кіраўніцтва федэрацыі робяць усё магчымае, каб арганізаваць нейкія спаборніцтвы ўнутры Беларусі, імкнуцца прывезці расіян да нас, а нас туды звазіць. У Кыргызстан яшчэ ездзілі. Што тычыцца Гульняў, вельмі хацела б бачыць у саперніцах расіянку Кацярыну Вербіну. Змагаліся аднойчы, тады я ўзяла верх, але хацела б з ёй яшчэ паспаборнічаць. Яна моцная і цікавая спартоўка. У такіх сутычках удасканальваешся, расцеш над сабой.

- Рыхтаваліся вельмі доўга. Бачылі, што з боку Міністэрства спорту, Беларускай федэрацыі барацьбы, Рэспубліканскага цэнтра алімпійскай падрыхтоўкі «Стайкі», трэнераў прыкладаецца максімум намаганняў, каб спаборніцтвы прайшлі маштабна і прыгожа, - кажа галоўны трэнер каманды. - У Салігорску, дзе трэба будзе змагацца, мы ўжо правялі чэмпіянат краіны, адзін з адбораў і тэставыя спаборніцтвы да Гульняў. Спаборніцтвы на вышэйшым узроўні, нешта набліжанае да чэмпіянату Еўропы. Зразумела, што зала не такая маштабная, але выхады спартсменаў, прамая трансляцыя, асвятленне, дываны, трыбуны — усё прыгожа атрымалася!