Знешнеэканамічная дзейнасць

Магілёўская вобласць ажыццяўляе актыўную знешнегандлёвую дзейнасць. Штогод больш за палову ўсёй вырабленай у рэгіёне прадукцыі пастаўляецца на экспарт, а ў сферу знешнеэканамічнай дзейнасці ўключаецца ўсё больш суб’ектаў гаспадарання. Магілёўская вобласць падтрымлівае гандлёвыя адносіны са 108 дзяржавамі свету. Прадукцыя арганізацый вобласці экспартавалася ў 96 краін. Асноўнымі знешнегандлёвымі партнёрамі вобласці з’яўляюцца Расія, Украіна, Германія, Польшча, Кітай, Літва.

Таварная структура экспартных паставак Магілёўскай вобласці на працягу многіх гадоў прадстаўлена наступнымі арганізацыямі і іх таварамі: у хімічнай галіне: ААТ «Белшына» – адно з найбуйнейшых прадпрыемстваў Еўропы па выпуску шын, ААТ «Магілёўхімвалакно» – вядучы вытворца поліэфірнай прадукцыі; у машынабудаванні і прыборабудаванні: ААТ «Бабруйскі завод трактарных дэталяў і агрэгатаў» – трактары і запасныя часткі да іх, ААТ «Кіруючая кампанія холдынгу “Бабруйскаграмаш”» – сельскагаспадарчая тэхніка, ААТ «Завод “Электрарухавік”» – электрарухавікі, ААТ «Магілёўскі металургічны завод» – трубы сталёвыя і г.д.; у лёгкай прамысловасці: ААТ «Магатэкс» – больш за 60 назваў тканін, ААТ «Стужка» – стужкаткацкая, цюлегардзінная і плеценая прадукцыя, ЗАТ «Легпрамразвіццё» – пашыў спецадзення, выраб вырабаў з пластмас і г.д.; у харчовай прамысловасці: ААТ «Бабушкина крынка», ААТ «Малочныя горкі» – малочная прадукцыя, сыры, тварог, ёгурты, ААТ «Магілёўскі мясакамбінат», ААТ «Бабруйскі мясакамбінат» – ялавічына, каўбасныя і мясныя вырабы, тлушч харчовы, ААТ «Мажэліт» – жэлацін і клей касцяны, ААТ «Чырвоны харчавік» – кандытарскія вырабы, ААТ «Булачна-кандытарская кампанія “Дамачай”» – хлебабулачныя вырабы і г.д. У Кітай пастаўляюцца мяса птушкі, лён, малочная прадукцыя, ялавічына замарожаная, лесаматэрыялы.

Структура экспарту паслуг рэгіёна прадстаўлена наступным чынам: транспартныя, будаўнічыя, турыстычныя, камп’ютарныя, іншыя дзелавыя, медыцынскія і адукацыйныя паслугі.