Калектывам УК «Магілёўскі абласны драматычны тэатр» і УК «Магілёўская гарадская капэла» прысвоена званне «Заслужаны калектыў Рэспублікі Беларусь». Пра гэта паведамілі ў Магілёўскім аблвыканкаме.
Пакроўскую царкву на тэрыторыі Пустынскага Свята-Успенскага мужчынскага манастыра ў Мсціслаўскім раёне Магілёўскай вобласці адкрылі і асвяцілі 31 мая. Новы адлік у гісторыі храма пачаўся з блаславення архіепіскапа Магілёўскага і Мсціслаўскага Сафронія. Таксама павіншаваў прысутных старшыня Мсціслаўскага раённага выканаўчага камітэта Дзмітрый Пімашэнка.
Новыя цэны на газ і тарыфы на электраэнергію дзейнічаюць у Беларусі з 1 чэрвеня. Гэта прадугледжана пастановай Савета Міністраў ад 28 снежня 2019 года № 933.
Жыхары Магілёўшчыны актыўна прымаюць удзел у добраўпарадкаванні населеных пунктаў. Нядаўна ў аграгарадку Баравіца ўстанавілі некалькі дэкаратыўных масткоў. Аўтарам праекта выступіў дырэктар мясцовай школы Сяргей Акуліч, які намаляваў эскізы. Па іх работнікі культуры і райст вырабілі арыгінальныя масткі. У вёсцы Скачок добраўпарадкавалі возера, усталявалі дзіцячую пляцоўку. Падтрымліваюць чысціню і парадак ля дамоў жыхары вёскі Серны Бор Быхаўскага раёна.
«Зала адной карціны» пачала працаваць у Магілёўскім абласным мастацкім музеі імя П. В. Масленікава. Першай гледачы ўбачаць карціну «Беларускія льны» Віктара Грамыкі.
Будаўнічыя атрады пачалі працаваць на Магілёўшчыне. Зараз у іх складзе – больш за 60 чалавек. Усяго сёлета ў трэцім працоўным семестры плануецца працаўладкаваць амаль тры тысячы студэнтаў.