Леанід Мартынюк: рэзерв кадраў закладзе аснову для фарміравання будучай вертыкалі ўлады

Перспектыўны рэзерв кадраў закладвае аснову для фарміравання будучай вертыкалі ўлады. Такім меркаваннем з журналістамі падзяліўся памочнік Прэзідэнта – інспектар па Магілёўскай вобласці Леанід Мартынюк падчас нарады па кадравай палітыцы ў Магілёўскім гарвыканкаме.

«Праца, якая вядзецца ў краіне з кадравым рэзервам, заўсёды была асноўнай. Задачы, якія ставяцца Прэзідэнтам па падборы рэзервістаў, вельмі жорсткія. Таму людзі, якія знаходзяцца ў нас у рэзерве, – апора, якая ляжа ў аснову фарміравання вертыкалі ўлады. Гэта тыя маладыя людзі, якія пасля будуць годнай зменай, стануць ля руля прадпрыемстваў», – сказаў Леанід Мартынюк.

Па словах памочніка Прэзідэнта – інспектара па Магілёўскай вобласці, пры фарміраванні рэзерву кадраў велізарнае значэнне надаецца якаснаму падбору людзей. «Кандыдатам прад’яўляюцца асаблівыя патрабаванні: прафесіяналізм, навучальнасць і мэтанакіраванасць, – падкрэсліў ён. – Сёння людзі, якія знаходзяцца ў рэзервовых спісах, праходзяць усю ступень кадравай падрыхтоўкі: павышэнне кваліфікацыі, стажыроўкі. І гэта сістэмная праца павінна вылівацца ў якасную падрыхтоўку рэзервіста да яго прызначэння на пэўную пасаду».

У рэзерв кіруючых кадраў Магілёўскага гарадскога выканаўчага камітэта на 2022 год прапанавана ўключыць 94 кандыдатуры на 46 кіруючых пасад. На 39 кіруючых пасад дзяржаўнага апарату – 80 чалавек і на 7 пасад кіраўнікоў арганізацый гарадской уласнасці, прызначэнне на якую ажыццяўляецца старшынёй гарвыканкама, – 14 чалавек. Сярод іх 30 чалавек ва ўзросце да 31 года.

«Пасяджэнне камісіі праходзіць пастаянна. Каб бачыць перспектыву ў развіцці горада, мы павінны мець перспектыўны рэзерв кадраў. Да фарміравання рэзерву ставімся вельмі сур’ёзна. У 2021 годзе з чатырох чалавек, прызначаных на пасады, трое былі з рэзерву кадраў. Усе яны прызначаны на кіруючыя пасады. І гэта не проста фармальны падыход, гэта вывучэнне кандыдатур, іх адукацыі, – сказаў старшыня Магілёўскага гарвыканкама Уладзімір Цумараў. – Як правіла, мы разглядаем кадры або са студэнцкай парты, або з наяўнасцю вышэйшай адукацыі. Разглядаем не толькі як для рэзерву ў гарвыканкам, але і для гарадскіх камунальных прадпрыемстваў. Наш горад развіваецца, і шмат у чым поспех гэтага працэсу будзе залежаць ад кіраўнікоў гарадскіх прадпрыемстваў і арганізацый».

Адным з кандыдатаў рэзерву кадраў стала прарэктар па выхаваўчай рабоце Беларускага дзяржаўнага ўніверсітэта харчовых і хімічных тэхналогій Вольга Мацыкава. «На новым месцы можа быць шмат задач: праца з моладдзю, пажылымі людзьмі, дзейнасць у галіне аховы здароўя, культуры. Цяперашняя праца прарэктара – пэўная база, бо тут я ўзаемадзейнічаю з ветэранскімі арганізацыямі, «Белай Руссю», Беларускім саюзам жанчын. І ёсць перспектыва для далейшага развіцця, – адзначыла Вольга Мацыкава. – Таму варта працягваць вучыцца, паступаць у Акадэмію кіравання пры Прэзідэнце. Уключэнне ў рэзерв кадраў – каласальны давер».

БЕЛТА